Ако сте по потрага по здрав и хранлив десерт, ние сме повторно тука со нашите мал милион идеи за здрави десерти. За денес избравме интересна комбинација од ориз, мед, ананас и банана. Финалниот производ беше прекрасен и вкусен здрав сутлијаш, неодолив за секого.
Овој десерт повеќе наликува на пудинг од ориз, банана и ананас бидејќи на крај сите состојки се ставаат во блендер со цел да се добие убава и хомогена структура.
Ананасот е полн со ензими кои го подобруваат варењето, исто така полн е и со витамини, a највеќе со витамин Ц. Бананите се одличен извор на калиум, а оризот е богата и хранлива ризница на протеини и сложени јаглехидрати.
Потребни состојки за 4 порции:
- 1 чаша ориз (може и интегрален)
- 3 чаши вода
- 3 лажици мед
- 2 банани
- 3-4 кругови свеж ананас (ако немате свеж, може и од конзерва)
- малку кокос или ренданана кора од лимон (по желба).
Начин на подготовка:
Оризот и водата ставете ги на оган и оставете го оризот убаво да се свари и омекне дури не ја впие целата вода. На крај кога убаво ќе омекне додадете го медот и измешајте убаво. Почекајте неколку минути да се излади. Кога ќе биде изладен ставете го оризот во блендер заедно со ананасот, бананите и кокосот или ренданиот лимон и вклучете го блнедерот да ги измеша состојките неколку минути.
Потребно е да добиете густа и хомогена структура налик на пудинг.
Послужете го пудингот во стаклени садови за пудинг и одозгора доколку сакате наросете со малку цимет.
Добар апетит!
Аеробик и пилатес инструктор, Сопственик на FitLife Fitness Studio, Магистeр по фармација и диететика.